علشان نفهم الموضوع الغلس ده ونقفل بابه خالص نكلم فى كذا نقطه
بس نراجع مع بعض التعريفات
اللاكتوز: هو سكر اللبن وهو سكر ثنائى مكون من جلوكوز وجالاكتوز ويحتاج الى انزيم لللاكتاز حتى يتم هضمه وامتصاصه من الجهاز الهضمى
اللاكتاز: هى الإنزيم الهاضم لسكر اللاكتوز ونقصه يؤدى الى مرض يسمى عوز اللاكتاز او عدم تحمل اللاكتوز
عدم تحمل اللاكتوز: عدم قدره الجسم على هضم وامتصاص سكر اللبن (اللاكتوز) نتيجه نقص انزيم اللاكتاز يؤدى لظهور مجمعه من الأعراض مثل المغص والأسهال والتهابات الحفاضه
حساسية اللاكتوز: مفيش حاجه اسمها كدع والاسم ده غلط

:طيب اللاكتوز موجود فى ايه
كل انواع الحليب اللى طالعه من الثدييات ( الجاموس البقر الغنم الماعز والحليب الصناعى كله ما عدا انواع معينه)

:طيب الحليب ايه اللى مفيش فيه لاكتوز
كل الحليب اللى مصدره نبات زى الصويا واللوز وجوز الهند والحليب خالى اللاكتوز LF وحليب الأحماض الامينية والحليب المتحلل كليا

هل فيه انواع ( اسباب ) لعدم تحمل اللاكتوز؟
فيه اربع انواع
النوع الوراثي وده نادر جدا جدًا جدًا وفى حياتنا عمرنا ما شخصناه وده بيكون موجود من بعد الولاده على طول علشان كده بنقول مفيش حالات زى كده تتشخص عندنا وللاسف معظم الدكاتره بتشخص النوع ده كأنه اكثر نوع موجود. ارجع واقول النوع ده نادر وتقريبا مش موجود عندنا
النوع الثانى اسمه عدم تحمل لاكتوز اولى وده بيظهر بدايه من عمر خمس سنوات يعنى ابدا مش موجود فى للاطفال اقل من سنتين وده اكتر نوع موجود عندنا وده سببه ان انزيم اللاكتاز ربنا خلقه انه مستواه ييدأ يقل فى الجسم الطفل بعد سنتين ( لما اعتماده على اللبن يقل) لغايه لما يوصل لنسبه قليله اوى بعدها الطفل لو شرب لبن يتعب

النوع الثالث اسمه عدم تحمل اللاكتوز الثانوى: وده بيحصل مع بعض الامراض اللى بتعمل التهاب فى جدار الامعاء فيقل مع الالتهاب نسبه اللاكتوز زى ايه زى النزلات المعوية وحساسية الالبان والسيلياك ( حساسية القمح) وده اكتر نوع بنشوفه فى الاطفال اقل من سنه

النوع الرابع بيحصل بس فى للاطفال الخدج اللى انولدوا قبل الشهر السابع بيكون عندهم نقص وقتى يعنى بتكون موجوده من ساعه الولاده وتتحسن عند عمر اربع شهور

…….الخلاصة
الاولى بس فى للاطفال اللى اكتر من خمس سنوات (اكثر الانواع شيوعا)
الثانوى وده اللى بنشوفه غالبا مصاحب لحساسيه الالبان
النووع الوراثي نادر ومش حتشوفيه
النوع الوقتى بس فى الاطفال المبتسرين

ايه اعراض عدم التحمل؟
غازات وانتفاخات ومغص واسهال
والاسهال بيعمل التهابات حفاظه
فيه ملحوظه مهمه جدا جدا
ان عدم تحمل اللاكتوز درجات
فلو درجه بسيطه الاعراض بتكون بسيطه
لو نقص الانزيم شديد الاعراض بتكون شديده

الاعراض كلها اعراض جهاز هضمى + التهابات حفاظه من الاسهال
بس مفيش دم
ومفيش اعراض جلديه الا التهابات الحفاظه انما مفيش اكزيما او ارتيكاريا
مفيش اعراض تنفسيه

ازاى نشخصه؟
Stool pH 
لازم تكون اقل من 5.3 مينفعش يكتب بس انه حمدى
Stool reducing substance 
بيكون ايجابى
H breath test
للاسف التحليل غير متوفر فى مصر
Gene study 
غالى جدا وايه له قيمه كبيره فى التشخيص

طيب ايه علاجه؟
دى مهم اوى اوى
لو الطفل بيرضع طبيعى يكمل رضاعه طبيعه وياخذ نقط ايزى كول
توقف الرضاعه الطبيعيه فى حالتين بس
لو فيه ضعف فى النمو
او إسهال شديد بيخلى الطفل يدخل فى جفاف غير كده لا توقف ✋ الرضاعه الطبيعيه ابدا ابدا
لو الطفل بيرضع صناعى
ياخذ البان خاليه من اللاكتوز
زى الحليب الصناعى خالى اللاكتوز
حليب الصويا وبرده زبادى واجبان الصويا
حليب اللوز وجوز الهند الارز الشوفان الخ